Flatbrød og øl hand i hand

Flatbrød av utmeiska korn frå ølbryggjing

Resultatet av ølbryggjing er ikkje berre øl her i huset. Sunt og godt økologisk bygg og kveite skal ikkje gå til spille, så dermed lagar vi knasandes gode flatbrød og brød av det.

«Det var ikkje giftande jenta, med mindre ho kunne baka flatbrød, spinna og veva.»

I gamle dagar var flatbrød sjølve matbrødet i Norge. Det vart baka til alle anledningar, frå dei tynnaste og finaste med fine forsiringar til gjestebod og julebordet, til tjukke og grove flatbrød som var mettande for svoltne magar. Her på Vestlandet heitte det at det var ringt stell i heimen om husmora ikkje hadde flatbrød på lager. Og sjeldan hende vel det, for husmora følte seg matalaus om stabburet var tomt for flatbrød.

Bakstedagen var ein tung arbeidsdag på gardane rundt i landet. Husbonden hadde ansvaret for baksteveden som han hadde klargjort i god tid i forvegen, titt hende det at han hjelpte til med det tunge bakstearbeidet òg. Ofte baka dei opp så mykje at dei hadde flatbrød til over vinteren.
I vår tid er arbeidet litt enklare, med elektrisk steiketakke som ikkje treng store førebuingane for å setjast i gong, kan ein lage flatbrød titt og ofte --- og i alle fall etter kvar bryggjedag.

Oppskrifta mi er enkel, ca like deler utmeiska korn, mjøl og kokande vatn + salt. T.d.:

1 ltr utmeiska korn (eg har vore så heldig å få kjøpe økologisk malt hos Grim&Gryt )

1 ltr (eller inntil passelig kjevledeig) øko speltmjøl, alt. kveitemjøl (økologisk mjøl kjøper eg gjerne i storsekk her )

1 ltr kokande vatn

1 ts himalayasalt

Slå vatnet kokande i mjøl-/kornblandinga og elt godt i hop deiga, La den kvile under lokk inntil avkjølt før utkjevling i raust med mjøl. Børst av mjøloverskot før steiking på takke. Medium+ varme (trinn 6 på mi takke). Steik på begge sider. Du kan gjerne ettertørke flatbrøda i varmluftsomn 50 C grader med døra litt open. Flatbrøda kan virke mjuke mens dei er nysteikte, men dei vil bli sprø når dei blir kalde.

Meiskeporsjonane er gjerne større enn ein bakar opp i flatbrød i ei vende. Difor tørkar eg gjerne ein del på varmluft (dehydrator eller i varmluftskomfyr, 50 grader inntil knusktørt), og lagrar i tome mjølposar for seinare bruk.

Nydelig til julematen, til heimelaga pølser, til spekemat og kokte poteter - eller berre til å smøre med eit godt lag meierismør og knaske, med eller utan pålegg ;-)

 Det knusktørre flatbrødet har lang haldbarheitstid ved tørr lagring. Her står det seg godt i eit år i gammal tre-tine.