Julemorr - god gammaldags

Julemorr 

Sist helg var ei svært så produktiv ei. Vi parterte hjort, laga smeisandes gode julepølser - og der var akkurat nok timar i døgna til at vi fikk laga god gammaldags morr til jul òg :-)


~~~~


Oppskrifta er etter dei som dreiv det ein må kunne kalle landhandelen i barndomsbygda mi. Då eg var barn, var eg ofte med far min innom landhandelen for å kjøpe hektovis med løkrull, lammerull, sylteflesk eller anna ferskt oppskjær. Somrane plukka eg tyttebær og blåbær og leverte til innehavaren der, som vegde opp og betalte ut 'lønning': 8 kroner pr kilo ureinska bær, 12 kroner pr kilo reinska bær. Med iherdig innsats klarte eg ein sommar, trur eg var ca 10 år gammal, å plukke for tilsaman 1400,- kroner. Eg har aldri plukka anna enn til eige konsum etter det, for å seie det sånn.


~~~~


Når jula nærma seg, var det på landhandelen vi henta slakt for tilberedning til julematen. Om innehavaren sjølv produserte morr for sal i butikken sin eller om han berre produserte til eigen familie sitt konsum veit eg ikkje i skrivande stund, men han hadde iallfall ei god oppskrift som ho mor fekk med han og har brukt når ho lagar julemorr i alle år deretter. Denne har eg fått av henne, og eg har fått lov å dele den her. 

I all si enkelheit: 



\\~¨~//

1 ss salt pr kilo deig

1 ts pepar pr 2 kilo deig

1 ts allehånde pr 2 kilo deig

Svinetarm

\\~¨~//

Start med å legge svinetarm i kaldt vatn (evt tilsett litt eddik), i nokre timar. Skyll godt igjennom før du fyller med pølsemasse.

 ~~~~~~~~~~~~


 Vi laga kjøtdeig av tilsaman 5,4 kilo blanda svine- og hjortekjøt (det idèelle blandingsforholdet her seiest å vere ca 20-30% svinekjøt).

Morren skal vere grov i konsistens, eg kverna svinekjøtet x1 og hjortekjøt x2 før eg tilsette oppmålt mengde krydder og elta deiga godt ihop. 
Varièr kverning etter eige smak&behag vedr konsistens.

Deretter sette vi morrdeiga i kjøleskåp til dagen derpå - dette kan ein med fordel gjere for at krydder og salt skal fordele seg betre før ein eltar opp deiga igjen, men er ikkje eit absolutt krav.

Og så er det dags for å fylle i svinetarm; fyll i lange lengder, og knyt i endane med sterk hyssing. Kveile morren rundt t.d reine kosteskaft, og heng morrkveilane til tørk på kjølig og luftig plass. Ver nøye med å snu kveilane tidvis for å fordele væske samt hindre surning. Pass på at der kvar gong blir nye kontaktpunkt om du veljer å nytte trestang å tørke dei på, elles kan det lett surne. 

Tørke-/speketid minimum 3 veker - om morrpølsene då kjennest faste i konsistens, er dei klar til prøvesmaking og til jul :-)

Serverast kokt eller dampa saman med julematen, med poteter, flatbrød og meierismør, i tynne skiver på brødskiva, på koldtbord saman med annan spekemat, potetsalat og eggerøre ---  og gjerne med godt heimelaga øl attåt :-)

Oppbevarast som den tilberedast - luftig, tørt og kjølig.

~~~~~~~~~~~~

Vi brukte kjøt av økologisk frilandsgris og hjort som grunnlag i både julepølsene og morren i år. Kjøt av lam og/eller eller storfe kan òg nyttast. 

Lykke til!